انهاردة سمعت اغنية شيرين
((خلتنى اخاف))
أد ايه الاغنية دى كلماتها واحساسها صعب
اجبرتنى انى اكتب التوبيك دة
شيرين بدات الاغنية بسؤالها
فى حد ممكن مش قادر يعيش من غير الالم
اه فيه وكتير كمان لو مر عليهم يوم من غير مايحزنو
يبقى اليوم ده ماتحسبش عليهم
فى حد لو سابو اللى ظلمو يبقى هيموت م الندم
برضو فيه عشان اللى ظلمو ده بالنسبة ليه الدنيا
لما الدنيا تسيبو وهو يرضى بيموت م الندم
انو وافق حتى لو غصب عنو
خلتنى اخاف على حبى ليك اكتر مااخاف على نفسى منك
خلتنى ارتاح للعذاب وانا بين ايديك عشان بخاف من عذاب
البعد عنك
وقفت حياتى عليك وبس
ده حال ناس كتير اوى مننا وقت لما بتحب بضمير
بتخاف على الناس اللى بتحبهم سواء حبيب او صديق او غيرو
اكتر مابتخاف على نفسها ممكن تضحى بحياتها عشان الطرف التانى
بسعادتها
بروحها
كل التفكير ساعتها بيبقى ف الناس اللى بنحبهم وسعادتهم
احنا ممكن كمان ندعى اننا ناخود حزنهم وهما ياخدو فرحنا
حتى لو الطرف التانى ده كان سبب عذاب عايشين فيه
نختار عذابنا ونقول انو اهون من اننا نبعد عنهم
مع ان ممكن يكون البعد اهون من وجودنا جمبهم
بس برضو عشان خوفنا وحبنا ليهم مش بنقدر نبعد
ونقول نفضل جمبهم نطمن عليهم
يلاقونا جمبهم لما يحتاجونا
وزى ما قالت شيرين
((وقفت حياتى عليك وبس))
فعلا احنا من حبنا فيهم مش بنشوف غيرهم
مش بنفرح غير بفرحهم ونحزن بحزنهم
وكأن الدنيا هما بتقف حياتنا عليهم
وكأنى بفرح لو لاقيت قلبى اتظلــــــــــــــــــــــــــــــــــم
أد ايه الجملة دى بتوجع اوى وشيرين غنتها بااحساس عالى اوى
للدرجادي كتر الحب بيخلينا نتحمل الظلم بصعوبة احساسه
والظلم من مين؟ ده من حد بنحبة هو اللى يظلم
ومن كتر الظلم بقت قلوبنا تفرح بالظلم ده
وبرضو نتحمل ونكمل ونقول انو حد اقرب من روحنا لينا
وساعات كمان نجيب مبررات ونلوم على نفسنا
وكأننا احنا اللى غلطنا
ظلمت فيا ولسة عايشة بحبى ليك
بصعب عليا ولسة مش بصعب عليك
ولا يوم معايا غمضت عينى
مشيت ف سكة محسبتهاش
وعشان بحبك حبيت حاجات مابحبهاش
وادى النهايه
حد يرضى بظلمو ويكمل..اكيد ف لحظة لازم يفوء
وتصعب عليه نفسه وساعتها هيتألم اوى
وبرغم ده كله الطرف التانى مش حاسس بيجرح ويظلم
وكأن ده شىء عادى ده يمكن كمان يكون مفكر ان هو بجرحو بيسعد اللى بيحبو
وبرضو الطرف اللى بيحب بيسامح
ويعمل كل اللى يرضى التانى
يحب اللى يحبو ويكره اللى بيكرهو
وياترى بعد ده كله النهاية ايـــــــــــــــــــــه؟
مافيش حاجة هتتغير
اللى بيجرح هيفضل يجرح
وهيتمادى ف انانيتة
واللى بيضحى هيضحى اكتر
هيتألم اكتر وجرحو هيكبر
مش هيعرف يداويه
هيعيش وكأنة ميت
يبقى من الاحسن ليه انو يبعد
يتحمل عذاب البعد ولا انو يتهان ويتجرح
كل حاجة دايما بتبقى صعبة ف اولها
بس بعد كدة بنتعود
وبنرتاح على الاقل هنقدر نعيش حياتنا من جديد
موضوع: خلتنى اخاف 
