ياتري ... عندك هدف محدد في حياتك ؟!

طبعا النجاح في الحياة حاجة جميلة جدا .. بس صعبة .. وليها مقومات كتيرة من أهمها " تحديد هدف في الحياة "


اولا ليه نحدد هدف في حياتنا ؟.. علشان احنا بني ادمين وعندنا عقل وده اللي بيميزنا عن كتيير من الكائنات ولازم حياتنا يبقى ليها هدف وإلا نبقى ........

وعلى اساس ايه بنحدد هدفنا في الحياة ؟ .. على اساس اكتر حاجة نتمنى نحققها او اكتر حاجة مطلوبة مننا في حياتنا وبالتالي بتفرق اهدافنا كتيير باختلاف شخصياتنا و مسئولياتنا وموقعنا من التعليم والاسرة ... لكن بمجرد اقتناعك ان حياتك لازم يبقى ليها هدف يبقى لازم تحدده ....

ولازم الهدف ده يبقى واضح قدامك على طول وكل حاجة بتعملها في حياتك بتقارنها بهدفك معاه او ضده ومن ثم –حلوة من ثم دي- بتعملها او لأ .....وكتابة الاهداف في الحياة بيساعد على تحقيقها بنسبة 300% زي ما بتوع التنمية البشرية بيقولوا ..

طيب الاهداف ممكن تكون ايه ؟ .. فيه ناس هدفهم انهم يبقوا مشهورين وناس هدفهم يبقوا اغنياء وناس هدفهم يبقوا شطار في مجالهم يعني نجاح في مجال العمل وطبعا فيه ناس هدفهم كبير جدا وغالي جدا وياريت نبقى منهم اللي هدفهم في الحياة ارضاء الله عز وجل – وده متفق مع الغاية اللي اتخلقنا علشانها - عايشين كل همهم رضى ربنا سبحانه وتعالى .. بيعبد ربنا ويعمل الخير ويساعد الناس وينفق ويضحي ويصبر كل ده علشان ربنا سبحانه وتعالى

طيب احنا بنعمل الخير ليه ؟ .. مع ان ممكن ناس كتير تتهمنا ان لينا مصلحة او نلاقي نقد يزعلنا وممكن كمان يتقابل الخير ده بجحود بل ممكن يتقابل بشر .... احنا بنعمل الخير ومبنستناش حاجة من حد علشان مقتنعين ان جزاءه عند ربنا " وما تفعلوا من خير فإن الله به عليم " البقرة .. واكيد " وما تقدموا لأنفسكم من خير تجدوه عند الله " زي ما هوه ؟ لأ .. " تجدوه عند الله هو خيرا وأعظم أجرا " المزمل .. علشان كده بنعمل الخير ومبنستناش حاجة من حد

وفي الدنيا ... اللي اتعلم يعمل الخير ويدي وما يستناش حاجة من حد بيبقى عايش حياة جميلة جدا ... لأن ربنا سبحانه وتعالى اكد " من عمل صالحا من ذكر أو أنثى وهو مؤمن فلنحيينه حياة طيبة "

وعلى قد ما هدفك في الحياة بيكون كبير على قد ما بيكون تحقيقه صعب لكن بتحس ان حياتك ليها معنى كبير وانك احسن من غيرك كتير ... و اذا كانت النفوس عظيمة تعبت في مرادها الابدان

واكيد فيه حاجة اسمها اهداف صغيرة او اهداف مرحلية مرتبطة باليوم او الاسبوع او الشهر او السنة وكلها تتماشى مع هدفك في الحياة يعني احنا لازم نخطط لكل يوم في حياتنا ؟ ممكن اسألك انا.. احنا بنتحاسب على كل يوم في حياتنا ؟ اكيد لأ .. احنا بنتحاسب على كل لحظة في حياتنا وخلي بالك لا تزولا قدما عبد يوم القيامة حتى يُسأل عن اربع منها عمره وشبابه يعني سؤالين من الاربعة

لكن مش معنى اني عندي هدف انني مكشر على طول او جد اكتر من اللازم .. لأ.. اكيد فيه وقت للهزار او للعب او للترويح عن نفسي – في الحلال طبعا – بس وقت وليس كل الوقت

ياريت كل واحد يسأل نفسه ... أنا عندي هدف في الحياة ؟ .. ولاّ حياتي ملهاش هدف زي الـ ........ !!

ولو عندي هدف - وده المفروض - هل بعمل لتحقيق الهدف ده ؟! اسأل نفسك ... وجاوب نفسك بصراحة